AP Panchayat Elections: ఆంధ్రప్రదేశ్లో పంచాయతీ ఎన్నికల తొలి దశకు సంబంధించి నామినేషన్ల ప్రక్రియలో నేడు కీలక ఘట్టం చోటుచేసుకోనుంది. నామినేషన్లు దాఖలు చేయడానికి నేటితో గడువు ముగియనుంది. సాయంత్రం 5 గంటల వరకు అభ్యర్థులు తమ నామినేషన్లను సమర్పించుకోవచ్చు. చివరి రోజు కావడంతో నామినేషన్ల దాఖలుకు రాజకీయ పార్టీల నాయకులు, ఆశావహులు సిద్ధమవుతున్నారు. నామినేషన్ల స్వీకరణ ప్రక్రియ ముగిసిన అనంతరం రేపు నామినేషన్ల పరిశీలన చేపట్టనున్నారు. ఈ క్రమంలో నిబంధనలకు అనుగుణంగా లేని నామినేషన్లను తిరస్కరించనున్నారు. తిరస్కరణకు గురైన నామినేషన్లపై అభ్యర్థులు అప్పీల్ చేసుకునేందుకు ఈ నెల 19వ తేదీని కేటాయించారు. ఈ అప్పీళ్లను అప్పీలేట్ అధికారిగా వ్యవహరించే ఆర్డీవో (RDO) స్వీకరించనున్నారు.
నామినేషన్ల తిరస్కరణకు సంబంధించిన అప్పీళ్లను ఈ నెల 20వ తేదీన పరిష్కరించనున్నారు. అనంతరం అభ్యర్థులు తమ నామినేషన్లను ఉపసంహరించుకునేందుకు ఈ నెల 21వ తేదీ వరకు అవకాశం ఉంటుంది. అదే రోజు తుది అభ్యర్థుల జాబితాను ప్రకటించనున్నారు. ఇక, ఎన్నికల నిర్వహణకు ఈ నెల 26వ తేదీని నిర్ణయించారు. ఏవైనా అనివార్య కారణాలతో రీపోలింగ్ నిర్వహించాల్సిన అవసరం ఏర్పడితే ఈ నెల 27వ తేదీన చేపట్టనున్నారు. ఎన్నికల ఓట్ల లెక్కింపు అనంతరం ఈ నెల 26వ తేదీనే ఫలితాలను ప్రకటించనున్నారు. మొత్తంగా తొలి దశ పంచాయతీ ఎన్నికల ప్రక్రియ కీలక దశకు చేరుకోవడంతో గ్రామాల్లో రాజకీయ సందడి నెలకొంది. నామినేషన్ల చివరి రోజు కావడంతో అభ్యర్థులు, రాజకీయ పార్టీల నేతల్లో ఉత్కంఠ నెలకొంది.

