Telangana BRS Vs Congress AP Drought Comparison: తెలుగు రాష్ట్రాల రాజకీయాల్లో బీఆర్‌ఎస్ వర్కింగ్ ప్రెసిడెంట్ కేటీఆర్ , వైఎస్సార్‌సీపీ అధినేత వైఎస్ జగన్‌మోహన్ రెడ్డిల మధ్య ఉన్న సాన్నిహిత్యం, ఆ రెండు పార్టీల మధ్య ఉన్న సత్సంబంధాలు అందరికీ తెలిసినవే. గడిచిన కొన్నేళ్లుగా ఒకరికొకరు నైతిక మద్దతు ఇచ్చుకుంటూ వచ్చారు. కానీ, మారిన తెలంగాణ రాజకీయ సమీకరణాల్లో భాగంగా కేటీఆర్ తీసుకుంటున్న కొత్త రాజకీయ వ్యూహం ఇప్పుడు పొరుగు రాష్ట్రంలో ఉన్న తన ఆప్తమిత్రుడు జగన్‌మోహన్ రెడ్డిని ఇరకాటంలో పడేస్తోంది. తెలంగాణలో రేవంత్ రెడ్డి నేతృత్వంలోని కాంగ్రెస్ ప్రభుత్వాన్ని నిందించడానికి కేటీఆర్ పదే పదే ఆంధ్రప్రదేశ్‌లోని చంద్రబాబు నాయుడు సర్కార్ పాలనను, అక్కడ జరుగుతున్న వాటర్ మేనేజ్‌మెంట్‌ని ప్రశంసించడం రాజకీయ వర్గాల్లో చర్చనీయాంశమవుతోంది.
గతంలో తమ రాష్ట్రం గురించి గొప్పగా చెప్పుకోవడానికి ఏపీలో ఏమీ బాగోలేదని విమర్శలు
గతంలో బీఆర్‌ఎస్ అధికారంలో ఉన్న సమయంలో.. మా తెలంగాణలోనే సంక్షేమం, అభివృద్ధి వేగంగా సాగుతున్నాయి, పొరుగున ఉన్న ఏపీలో విద్యుత్ కోతలు, దారుణమైన రోడ్లు ఉన్నాయి అంటూ కేటీఆర్, ఇతర గులాబీ నేతలు పరోక్షంగా విమర్శించేవారు. అప్పుడు ఏపీలో సీఎంగా ఉన్నది తన మిత్రుడు వైఎస్ జగన్‌మోహన్ రెడ్డి అయినప్పటికీ, తెలంగాణ మోడల్‌ను గొప్పగా చాటుకోవడానికే కేటీఆర్ ఏపీని తక్కువ చేసి మాట్లాడారు. ఇక ఇప్పుడు సీన్ తలకిందులైంది. తెలంగాణలో బీఆర్‌ఎస్ ప్రతిపక్షంలోకి రావడం, కాంగ్రెస్ ప్రభుత్వం పీఠం ఎక్కడంతో.. రేవంత్ రెడ్డి నమూనా ఎంత దారుణంగా ఉందో చూపించే క్రమంలో చూడండి, పక్క రాష్ట్రమైన ఏపీలోనూ ఎల్‌నినో ఉంది, కానీ అక్కడ చంద్రబాబు ప్రభుత్వం పరిస్థితులను ఎంత పక్కాగా మేనేజ్ చేస్తోంది! అంటూ చంద్రబాబు వైపు కితాబుల వర్షం కురిపిస్తున్నారు.
కేటీఆర్‌కు..జగన్‌ను ఇబ్బంది పెట్టాలని లేదు!
ఈ వ్యూహంలో కేటీఆర్‌కు ఎలాంటి స్వార్థ రాజకీయ స్వార్థం లేకపోవచ్చు. కేవలం తెలంగాణ కాంగ్రెస్‌పై దాడి చేయడమే ప్రధాన ఉద్దేశం కావచ్చు. కానీ, కేటీఆర్ నోటి వెంట వస్తున్న ఈ మాటలు నేరుగా ఆంధ్రప్రదేశ్‌లో వైఎస్ జగన్ రాజకీయ మనుగడకు, ప్రతిపక్ష పోరాటానికి పెను శరాఘాతంగా మారుతున్నాయి. ఏపీలో కూటమి ప్రభుత్వం దారుణంగా విఫలమైందని, కరవును ఎదుర్కోవడంలో చంద్రబాబు చేతులెత్తేశారని వైఎస్సార్‌సీపీ క్షేత్రస్థాయిలో ఆందోళనలు చేస్తుంటే.. తెలంగాణ నుంచి జగన్ మిత్రుడే అయిన కేటీఆర్ వచ్చి ఆంధ్రాలో చంద్రబాబు పాలన, వాటర్ మేనేజ్‌మెంట్ బాగుంది అని సర్టిఫికేట్లు ఇవ్వడం వైసీపీ ప్రచారానికి పూర్తిగా గొడ్డలిపెట్టులా మారుతోంది. టీడీపీ నేతలు, మద్దతుదారులు కేటీఆర్ కామెంట్లను ఆయుధంగా మలుచుకుని నెట్టింట విరుచుకుపడుతున్నారు. జగన్ సన్నిహితుడైన కేటీఆర్ కూడా కూటమి ప్రభుత్వ పాలనను మెచ్చుకుంటున్నారు, ఇక జగన్ చెప్పే కల్పిత విమర్శలను ఎవరు నమ్ముతారు? అంటూ సోషల్ మీడియాలో విపరీతంగా ట్రోల్ చేస్తున్నారు. దీంతో ఏపీలో వైసీపీ నేతలు ప్రతిసారీ కేటీఆర్ వ్యాఖ్యలకు సమర్థన ఇచ్చుకోలేక, అలాగని మిత్రుడిని విమర్శించలేక తీవ్ర మానసిక మథనానికి గురవుతున్నారు. జగన్‌ను కన్ఫ్యూజన్‌లో పడేస్తున్న ఈ కామెంట్లు వైఎస్సార్‌సీపీ క్యాడర్‌కు తీవ్ర నిరాశను కలిగిస్తున్నాయి.
కేటీఆర్‌కు సొంత రాజకీయాలు ముఖ్యం
రాజకీయంలో శాశ్వత మిత్రులు, శత్రువులు ఉండరు అనే నానుడితో పాటు సొంత ఇంటి సంక్షోభం ముందర పొరుగువారి స్నేహం ద్వితీయమే అనే సూత్రం ఇక్కడ స్పష్టంగా కనిపిస్తోంది. కేటీఆర్‌కు ఇప్పుడు తెలంగాణలో రేవంత్ రెడ్డిని దెబ్బతీయడం, రాబోయే స్థానిక సంస్థల ఎన్నికల్లో బీఆర్‌ఎస్‌ను మళ్లీ బలమైన పునాదిపై నిలబెట్టడం మాత్రమే ఏకైక ప్రాధాన్యత. అందుకోసం వైరి వర్గమైన చంద్రబాబునైనా సరే మెచ్చుకోవడానికి ఆయన వెనుకాడటం లేదు. ఈ క్రమంలో తన మిత్రుడు జగన్‌కు రాజకీయంగా ఎంత నష్టం జరుగుతోందనే అంశాన్ని కేటీఆర్ పూర్తిగా పక్కన పెట్టేసినట్లే కనిపిస్తోంది. తమ సొంత ప్రయోజనాలు, రాజకీయ వ్యూహాల కోసమే కేటీఆర్ ఆంధ్రాను వాడుకుంటుండటంతో, స్నేహానికి-రాజకీయ అవసరాలకు మధ్య ఉన్న స్పష్టమైన సరిహద్దులు బయటపడ్డాయి. మిత్రుడి ఇబ్బందులను పక్కనపెట్టి కేటీఆర్ సాగిస్తున్న ఈ సెల్ఫ్-పొలిటికల్ గేమ్ రాబోయే రోజుల్లో జగన్-కేటీఆర్‌ల చెలిమిపై ఎలాంటి ప్రభావం చూపుతుందో, ఏపీ రాజకీయాల్లో వైఎస్సార్‌సీపీ దీనికి ఎలా కౌంటర్ ఇస్తుందో వేచి చూడాలి.