கோவை: அமைச்சர் கே.ஏ.செங்கோட்டையன் கோவையில் செய்தியாளர்களிடம் கூறியதாவது: தமிழக முதல்வர் பல்வேறு நலத்திட்டங்களை செயல்படுத்தி வருகிறார். நிகழ்ச்சிகளில் பங்கேற்க 2 முறை தமிழகத்துக்கு வந்த பிரதமர், தமிழக முதல்வரை சிறந்த முதல்வர் என்றும், நேர்மையான ஆட்சியை நடத்தி வருபவர் என்றும் பாராட்டியுள்ளார். தமிழக அரசின் மீது யாரும் சாட்டையைச் சுழற்ற முடியாது.
இந்த இயக்கம் மக்களால் தேர்ந்தெடுக்கப்பட்டது. இரண்டு ஆளும் கட்சிகளையும் எதிர்க்கட்சி வரிசையில் அமர வைத்த இயக்கம் இது. கள்ளக்குறிச்சி ஆட்சியருக்கு எம்எல்ஏ குறுஞ்செய்தி அனுப்பிய விவகாரத்தில் விசாரணை முடிந்த பிறகே அதுகுறித்து பதிலளிக்க முடியும்.
தமிழகத்தில் சட்டம் ஒழுங்கு சரியில்லை என்று எதிர்க்கட்சித் தலைவரும், திமுகவினரும் கூறுகின்றனர். திமுக ஆட்சியை மக்கள் ஏன் மாற்றினார்கள் என்பதற்கு அவர்கள் பதிலளிக்க வேண்டும்.
சிறந்த ஆட்சியை வழங்கியிருந்தால் ஏன் எதிர்க்கட்சி வரிசையில் அமர்ந்தார்கள்? சிறந்த ஆட்சியை வழங்கியதாக கூறும் அதிமுக, ஏன் மூன்றாவது இடத்துக்கு தள்ளப்பட்டது என்பதற்கும் பதிலளிக்க வேண்டும். தவெக சட்டப்பேரவை உறுப்பினர்கள் அனைவருக்கும் முதல்வர் உரிய அறிவுரைகளை வழங்கியுள்ளார். இவ்வாறு அவர் கூறினார்.
சூரசம்ஹார விழாவின்போது முதல்வர் விஜய்க்கு அரோகரா முழக்கம்: தலைவர்கள் கண்டனம்
