சென்னை: பிரபஞ்சத்துக்கும், மனிதனுக்கும் இடையிலான ஆழமான தொடர்பை ‘அப்ஸ்ட்ராக்ட்’ ஓவியங்கள் மூலம் உணர்த்தும் வகையில் பிரபல ஓவியர் சுந்தரேசன் ஜெகன்னிவாசனின் (ஜெகன்) ‘காஸ்மிக் அர்பன் கனெக்ட்’ ஓவியக் கண்காட்சி சென்னை லலித் கலா அகாடமியில் நேற்று தொடங்கியது. எஸ்கேசிஎல் நிறுவனத்தின் நிர்வாக இயக்குநர் மீரா ரெட்டி தொடங்கி வைத்தார்.
தாள்களில் வரையப்பட்ட பேனா சித்திரங்கள், எண்ணெய் வண்ணம், அக்ரிலிக், கேன்வாஸில் உருவாக்கப்பட்ட 108 ஓவியங்கள் காட்சிக்கு வைக்கப்பட்டுள்ளன.
நுழைவுவாயிலில் வைக்கப்பட்டுள்ள 48 சிறிய ஓவியங்களின் தொகுப்பு, பார்வையாளர்கள் தங்கள் விருப்பத்துக்கு ஏற்ப மாற்றி அமைத்து பல கோடி வடிவங்களை தாங்களாகவே உருவாக்கிக் கொள்ளும் வகையில் உருவாக்கப்பட்டுள்ளது.
கண்காட்சி குறித்து ஓவியர் ஜெகன் கூறியதாவது: சென்னை மனிதர்களையும், அவர்களது நகைச்சுவை உணர்வையும் என் தந்தை எழுத்தாளர் பாக்கியம் ராமசாமி (ஜ.ரா.சுந்தரேசன்) தனது எழுத்துகளால் வண்ணமயமாக்கினார்.
பிரபஞ்சமும், நாமும் ஒன்றுதான் என்பதை எனது ஓவியங்கள் மூலம் வெளிப்படுத்தியுள்ளேன். நாம் ஒரு வாய் சாப்பிட வேண்டும் என்றால், எங்கேயோ மழை பெய்து, யாரோ ஒருவர் விவசாயம் செய்து, அது பல்வேறு சங்கிலித்தொடர் செயல்பாடுகளை கடந்து நம் கைக்கு வந்து சேர வேண்டும்.
ஒட்டுமொத்த உலகமும், பிரபஞ்சமும் நமக்காகவே இயங்குகின்றன என்ற தத்துவத்தின் அடிப்படையில் இக்கண்காட்சி உருவாக்கப்பட்டுள்ளது. இங்கு உள்ள அனைத்தும் வண்ணங்கள் மூலம் மனித உணர்வுகளை வெளிப்படுத்தும் அப்ஸ்ட்ராக்ட் ஓவியங்கள்.
ஏஐ தொழில்நுட்பம் வந்தாலும்கூட, நமது பாரம்பரிய ஓவியக் கலை 150 ஆண்டுகள் வரை உறுதியாக நிலைத்திருக்கும். இவ்வாறு அவர் கூறினார். கண்காட்சி ஒருங்கிணைப்பாளராக பிரபல ஓவியக் கலைஞர் எம்.ஜி.தொட்டமணி செயல்படுகிறார்.
இந்த நிகழ்வில் மேடெக்ஸ் நிறுவன நிர்வாகி யோகேஸ்வரன், எத்திராஜ் மகளிர் கல்லூரி தலைவர் வி.எம்.முரளிதரன், டிஎஸ்எம் உரிமையாளர் கே.மகாலிங்கம், எஸ்கே சிஎல் சிவன் ரெட்டி உள்ளிட்டோர் பங்கேற்றனர். கண்காட்சி நவ.20-ம் தேதி வரை நடைபெறுகிறது. காலை 11 முதல் மாலை 7 மணி வரை பார்வையிடலாம்.
பதிவுக்கான ஆவணத்தை மக்களே உருவாக்கலாம்: எளிய வழிமுறை வெளியிட்டது பதிவுத் துறை