TDP Alliance Sweeps AP ZPTC MPTC Elections: ఆంధ్రప్రదేశ్ స్థానిక సంస్థల సమరంలో పట్టణ మున్సిపల్ ఎన్నికలతో పోలిస్తే, గ్రామీణ పరిషత్ ఎన్నికల ఫలితాలు వైఎస్సార్‌సీపీకి ఒక రకమైన ఊరటను, క్షేత్రస్థాయిలో ఆశలను చిగురింపజేశాయి. 2024 సాధారణ ఎన్నికల దెబ్బ తర్వాత పార్టీ గ్రాఫ్ పూర్తిగా పడిపోయిందని భావించిన తరుణంలో, గ్రామీణ పోరులో ప్రతికూల పరిస్థితుల మధ్య కూడా వైఎస్సార్‌సీపీ 70కి పైగా జడ్పీటీసీ స్థానాలను, వెయ్యికి పైగా ఎంపీటీసీ స్థానాలను కైవసం చేసుకుని తన ఉనికిని పటిష్టంగా చాటుకుంది. అసలు పోటీలోనే నిలబడదు అనుకున్న చోట ఈ స్థాయిలో ఫలితాలు సాధించడం ద్వారా పార్టీ ఇంకా పోరాడుతోంది, క్షేత్రస్థాయి కేడర్ ఇంకా సజీవంగా ఉంది అనే బలమైన అభిప్రాయం సాధారణ రాజకీయ వర్గాల్లోనూ, పార్టీ శ్రేణుల్లోనూ వ్యక్తమైంది.
ఈ మైలేజ్‌ను అందుకోలేని వ్యూహాత్మక తప్పిదం
అయితే, ఈ విజయాలు తెచ్చిపెట్టాల్సిన పొలిటికల్ మైలేజ్‌ను, రాజకీయ సాధికారతను వైఎస్సార్‌సీపీ స్వీకరించలేని స్థితిలోకి చేరుకోవడం వెనుక ఆ పార్టీ అధినేత వైఎస్ జగన్ మోహన్ రెడ్డి చేసిన వ్యూహాత్మక తప్పిదమే ప్రధాన కారణమనే విశ్లేషణలు వినిపిస్తున్నాయి. ఎన్నికల ప్రక్రియ ప్రారంభమైనప్పటి నుంచీ జగన్ మోహన్ రెడ్డి ఈ ఎన్నికలను ఏమాత్రం పరిగణనలోకి తీసుకోనట్లుగా ప్రవర్తించారు. ఇవి ప్రజాస్వామ్యబద్ధంగా జరుగుతున్న ఎలక్షన్లు కావు.. కూటమి ప్రభుత్వం జరిపించుకుంటున్న సెలక్షన్లు అంటూ ఆయన నిరంతరం చేసిన ప్రకటనలు, ప్రచారాన్ని తేలికగా తీసిపారేసిన తీరు పార్టీ కేడర్‌ను ఆత్మరక్షణలో పడేసింది.
ఎన్నికల నిర్వహణపై నమ్మకం లేదన్న జగన్
వైఎస్సార్‌సీపీ శ్రేణులు క్షేత్రస్థాయిలో కష్టపడి 70కి పైగా జడ్పీటీసీలు, 1,000కి పైగా ఎంపీటీసీ స్థానాలను సాధించినప్పటికీ, అసలు ఈ ఎన్నికలే చెల్లవు, వీటిని మనం గుర్తించడం లేదు అని స్వయంగా అధినేతే ప్రకటిస్తే.. ఆ గెలుపును పార్టీ ఎలా సంబరంగా జరుపుకోగలదు? గ్రామీణ ఓటర్లు అధికార కూటమి ఒత్తిళ్లను సైతం తట్టుకుని వైఎస్సార్‌సీపీ అభ్యర్థులకు ఓట్లేసి గెలిపించినప్పుడు, ఆ గెలుపును సొంతం చేసుకుని ప్రజల్లో మార్పు ప్రారంభమైంది అని గట్టిగా మైకులు పెట్టి ప్రచారం చేసుకోవాల్సిన బాధ్యత నాయకత్వానిదే. కానీ, ముందే ఎన్నికలను కొట్టిపారేయడం వల్ల ఆ విజయాన్ని తమ ఖాతాలో వేసుకుని రెస్పాన్స్ ఇవ్వలేని వింత రాజకీయంలో వైఎస్సార్‌సీపీ చిక్కుకుంది. రాజకీయాల్లో తమను తాము సరిగ్గా అంచనా వేసుకోలేకపోవడం , తాము పుంజుకుంటున్నామన్న భావనను ప్రజాక్షేత్రంలోకి బలంగా తీసుకెళ్లలేకపోవడం అతిపెద్ద బలహీనత. ఒకవైపు ఎన్డీయే కూటమి తమ ఆధిక్యతను ఓపెన్‌గా వేడుక చేసుకుంటూ మెజార్టీ స్థానాలను కైవసం చేసుకున్నామని ప్రచారం చేసుకుంటుంటే, వైఎస్సార్‌సీపీ మాత్రం తమకు లభించిన గ్రామీణ ఓటు బ్యాంకు పునాదిని కూడా పొలిటికల్ ఆయుధంగా మార్చుకోలేకపోయింది. నాయకుడే విముఖత చూపినప్పుడు, గెలిచిన అభ్యర్థులు కూడా తమ విజయాలను పబ్లిసిటీ చేసుకోలేక చప్పగా మిగిలిపోయారు.
జగన్ మొదటి నుంచి ఎన్నికలను సీరియస్‌గా తీసుకుని ఉంటే?
ఒకవేళ జగన్ మోహన్ రెడ్డి ఈ ఎన్నికలను మొదటి నుంచీ సీరియస్‌గా తీసుకుని, క్షేత్రస్థాయి నేతలకు వెన్నుదన్నుగా నిలిచి ప్రచారం చేసి ఉంటే.. సాధించిన ఈ 70 జడ్పీటీసీలు , 1,000 ప్లస్ ఎంపీటీసీ స్థానాలు పార్టీకి పెద్ద టర్నింగ్ పాయింట్‌గా మారేవి. కూటమికి ధీటుగా గ్రామీణ ఏపీలో వైఎస్సార్‌సీపీ మళ్లీ లేచింది అనే నెరేటివ్‌ను ప్రజల్లోకి బలంగా పంపడానికి అవకాశం ఉండేది. కానీ, ముందే డిఫెన్సివ్ మోడ్‌లోకి వెళ్లి ఎన్నికలపై ప్రతికూల కామెంట్లు చేయడం వల్ల, శ్రేణుల్లో లభించిన కొద్దిపాటి ఉత్సాహం కూడా బయటకు వ్యక్తం కాకుండా అణచివేసినట్లయింది. రాజకీయాల్లో లభించిన చిన్న అవకాశాన్ని కూడా పెద్ద మైలేజ్‌గా మార్చుకోవడమే సమర్థవంతమైన వ్యూహం. వైఎస్సార్‌సీపీ మున్సిపల్ ఎన్నికల పరాభవం నుంచి కోలుకుని పరిషత్ పోరులో కొంతవరకు పుంజుకున్నప్పటికీ, అధినేత వైఖరి వల్ల ఆ పుంజుకున్న భావనను ప్రజల్లోకి గట్టిగా తీసుకెళ్లడంలో విఫలమైంది. ఇప్పటికైనా వైఎస్సార్‌సీపీ తమ వ్యూహాత్మక పొరపాట్లను సరిదిద్దుకుని, ప్రతి చిన్న ఎన్నికల విజయాన్ని కూడా పార్టీ పునరుజ్జీవనానికి పునాదిగా మార్చుకోకపోతే.. శ్రేణుల్లో ఆత్మవిశ్వాసం సన్నగిల్లే ప్రమాదం ఉంది.