Ap Municipal Elections: ఆంధ్రప్రదేశ్‌లో మున్సిపల్ ఎన్నికల పోలింగ్ ప్రక్రియ కొనసాగుతుండగా కడప, పులివెందుల నియోజకవర్గాల పరిధిలోని పలు పోలింగ్ కేంద్రాల వద్ద తీవ్ర ఉద్రిక్త పరిస్థితులు చోటుచేసుకున్నాయి. పోలింగ్ స్టేషన్లలోకి తమను వెళ్లనివ్వకుండా టీడీపీ ఏజెంట్లు అడ్డుకుంటున్నారని, తమపై దాడులు చేసి ఫోన్లు పగలగొట్టి చొక్కాలు చించివేశారని వైసీపీ ఏజెంట్లు తీవ్ర నిరసన, ఆందోళనకు దిగారు. ఈ హఠాత్ పరిణామంతో అప్రమత్తమైన పోలీసు బృందాలు తక్షణమే రంగంలోకి దిగి పరిస్థితిని అదుపులోకి తీసుకొచ్చాయి. రెండు పార్టీల ఏజెంట్లతో చర్చలు జరిపిన పోలీసులు, శాంతిభద్రతలకు విఘాతం కలిగిస్తే కఠిన చర్యలు తీసుకుంటామని హెచ్చరించడంతో ఇరువర్గాలు వెనక్కి తగ్గాయి.
కొనసాగుతున్న పోలింగ్.. 12 రకాల గుర్తింపు కార్డులకు అనుమతి, మొబైల్ ఫోన్లపై కఠిన నిషేధం:
ప్రస్తుతం కడప, పులివెందులలో ఉద్రిక్తతలు సద్దుమణగడంతో ఎన్నికల పోలింగ్ (Ap Municipal Elections)ప్రశాంతంగా కొనసాగుతోంది. తమ ఓటు హక్కును వినియోగించుకునేందుకు ఓటర్లు ఉదయం నుంచే క్యూలైన్లలో ఓపికగా వేచి ఉన్నారు. ఓటర్ కార్డు లేనివారు ఆధార్ కార్డుతో పాటు ఈసీ సూచించిన 12 రకాల ప్రత్యామ్నాయ గుర్తింపు కార్డులు, ఓటర్ స్లిప్పులు చూపించి ఓటింగ్ ప్రక్రియలో పాల్గొంటున్నారు. కాగా, పోలింగ్ కేంద్రాల లోపలికి మొబైల్ ఫోన్లు, ఇతర ఎలక్ట్రానిక్ వస్తువులను తీసుకెళ్లడంపై అధికారులు కఠిన నిషేధం విధించి భద్రతను పర్యవేక్షిస్తున్నారు.