AP High Court: తెలుగుదేశం పార్టీ అధినేత, ఏపీ ముఖ్యమంత్రి నారా చంద్రబాబు నాయుడుపై నమోదైన మద్యం, ఇసుక, ఫైబర్ గ్రిడ్ కేసుల మూసివేతకు సంబంధించిన వ్యవహారంలో ఆంధ్రప్రదేశ్ హైకోర్టు కీలక సూచనలు చేసింది. ఈ కేసులకు సంబంధించిన సర్టిఫైడ్ కాపీలు కావాలనుకునే పిటిషనర్లు ఏసీబీ కోర్టులో తగిన అప్లికేషన్ దాఖలు చేసుకోవాలని స్పష్టం చేసింది. థర్డ్ పార్టీకి కూడా సర్టిఫైడ్ కాపీలు పొందే అవకాశం ఉందని హైకోర్టు పేర్కొంది. క్రిమినల్ రూల్స్ ఆఫ్ ప్రాక్టీస్లోని రూల్ 212(ఏ) సవరణను ఈ సందర్భంగా హైకోర్టు గుర్తుచేసింది. ఈ నిబంధన ప్రకారం థర్డ్ పార్టీలు కూడా అవసరమైన విధానాన్ని అనుసరించి కేసులకు సంబంధించిన సర్టిఫైడ్ కాపీలను పొందవచ్చని తెలిపింది.
చంద్రబాబు తదితరులపై నమోదైన మద్యం, ఇసుక, ఫైబర్ గ్రిడ్ కేసుల మూసివేతకు సంబంధించిన పత్రాల సర్టిఫైడ్ కాపీలు ఇవ్వడానికి ఏసీబీ కోర్టు నిరాకరించింది. ఏసీబీ కోర్టు ఇచ్చిన ఈ ఉత్తర్వులను సవాల్ చేస్తూ పిటిషనర్లు ఏపీ హైకోర్టును ఆశ్రయించారు. ఈ పిటిషన్లపై విచారణ చేపట్టిన హైకోర్టు.. సర్టిఫైడ్ కాపీల కోసం ఏసీబీ కోర్టులోనే తగిన అప్లికేషన్ వేసుకోవచ్చని సూచించింది. ఈ మేరకు పిటిషనర్లకు వెసులుబాటు కల్పించిన హైకోర్టు, తగిన దరఖాస్తు చేసుకునే అవకాశం ఇస్తూ దాఖలైన పిటిషన్లను డిస్పోజ్ చేసింది. దీంతో చంద్రబాబుపై నమోదైన కేసుల మూసివేతకు సంబంధించిన సర్టిఫైడ్ కాపీల వ్యవహారంలో తదుపరి ప్రక్రియ కోసం పిటిషనర్లు ఏసీబీ కోర్టును ఆశ్రయించాల్సి ఉంటుంది.

