West Godavari Coconut Farmers: అర్నబ్‌ తుఫాన్‌ పశ్చిమగోదావరి జిల్లాలోని కొబ్బరి రైతులకు కోలుకోలేని నష్టాన్ని మిగిల్చింది. తుఫాన్‌ ప్రభావంతో వీచిన బలమైన ఈదురుగాలులకు వందలాది కొబ్బరి చెట్లు నేలకొరిగాయి. మరికొన్ని చెట్ల తలలు విరిగిపోవడంతో కొబ్బరి సాగు తీవ్రంగా దెబ్బతింది. ఏళ్ల తరబడి కష్టపడి పెంచుకున్న చెట్లు కళ్లముందే కూలిపోవడంతో రైతులు కన్నీరుమున్నీరవుతున్నారు. ముఖ్యంగా తుఫాన్‌ తీరం దాటిన మొగల్తూరు ప్రాంతంలో కొబ్బరి తోటల పరిస్థితి దయనీయంగా మారింది.
అర్నబ్‌ తుఫాన్‌ ప్రభావంతో మొగల్తూరు ప్రాంతంలో కొబ్బరి తోటలకు భారీ నష్టం వాటిల్లింది. ప్రచండ ఈదురుగాలుల ధాటికి పెద్ద సంఖ్యలో కొబ్బరి చెట్లు నేలకొరిగాయి. మరికొన్ని చెట్ల పైభాగాలు విరిగిపోయాయి. నరసాపురం తీర ప్రాంతం పొడవునా విరిగిపడిన కొబ్బరి చెట్లు కనిపిస్తున్నాయి. తుఫాన్‌ తీవ్రతకు తోటలు పూర్తిగా దెబ్బతినడంతో కొబ్బరి సాగుపై ఆధారపడిన రైతులు ఆందోళన చెందుతున్నారు. కొబ్బరి చెట్లు పెరిగి దిగుబడి ఇవ్వడానికి చాలా సంవత్సరాలు పడుతుంది. అలాంటిది ఏళ్ల తరబడి ఎంతో కష్టపడి పెంచుకున్న చెట్లు ఒక్క తుఫాన్‌తో నేలకొరగడంతో రైతులు తీవ్ర ఆవేదన వ్యక్తం చేస్తున్నారు. ఇప్పటికే సాగు ఖర్చులు, పెట్టుబడులతో ఇబ్బందులు పడుతున్న తమకు అర్నబ్‌ తుఫాన్‌ రూపంలో మరో పెద్ద దెబ్బ తగిలిందని వాపోతున్నారు. చెట్లు పూర్తిగా విరిగిపోవడంతో పాటు మరికొన్ని చెట్ల తలలు దెబ్బతినడంతో భవిష్యత్తులో దిగుబడిపైనా ప్రభావం పడనుంది.
తుఫాన్‌ కారణంగా నష్టపోయిన కొబ్బరి తోటలను అధికారులు క్షేత్రస్థాయిలో పరిశీలించాలని రైతులు కోరుతున్నారు. జరిగిన నష్టాన్ని సమగ్రంగా అంచనా వేసి.. బాధిత కొబ్బరి రైతులకు తగిన పరిహారం అందించాలని విజ్ఞప్తి చేస్తున్నారు. ముఖ్యంగా మొగల్తూరు, నరసాపురం తీర ప్రాంతాల్లో దెబ్బతిన్న తోటలను పరిశీలించి రైతులకు ఆర్థికంగా అండగా నిలవాలని కోరుతున్నారు. అర్నబ్‌ తుఫాన్‌ పశ్చిమగోదావరి జిల్లాలోని కొబ్బరి రైతుల జీవితాలను తీవ్రంగా ప్రభావితం చేసింది. చేతికొచ్చే దిగుబడితో ఆదాయం పొందాల్సిన సమయంలో చెట్లు నేలకొరగడంతో రైతులకు భారీ నష్టం వాటిల్లింది. ప్రభుత్వం త్వరగా స్పందించి నష్టపరిహారం అందిస్తుందనే ఆశతో అన్నదాతలు ఎదురుచూస్తున్నారు.