ప్రభుత్వ రంగ సంస్థలో శిక్షణ పొందాలని ఎదురుచూస్తున్న నిరుద్యోగ యువతకు శుభవార్త. భారత అంతరిక్ష పరిశోధనా సంస్థ (ISRO)కు చెందిన ఆంధ్రప్రదేశ్‌లోని శ్రీహరికోట సతీశ్‌ ధావన్‌ స్పేస్‌ సెంటర్‌ (SDSC SHAR) భారీగా అప్రెంటిస్‌ పోస్టుల భర్తీకి నోటిఫికేషన్‌ విడుదల చేసింది. వివిధ విభాగాల్లో మొత్తం 400 అప్రెంటిస్‌ ఖాళీలను భర్తీ చేయనుంది. అర్హత కలిగిన అభ్యర్థుల నుంచి ఆన్లైన్ దరఖాస్తులను ఆహ్వానిస్తోంది. ఆసక్తి ఉన్నవారు నవంబర్ 26, 2026లోగా దరఖాస్తు చేసుకోవాలి. ఈ నోటిఫికేషన్‌ ద్వారా మొత్తం 6 కేటగిరీల్లో పోస్టులను భర్తీ చేయనున్నారు. మెకానికల్‌, ఏరోస్పేస్‌, ప్రొడక్షన్‌, ఇండస్ట్రియల్‌ ఇంజినీరింగ్‌, ఎలక్ట్రానిక్స్‌, ఎలక్ట్రికల్‌ అండ్‌ ఎలక్ట్రానిక్స్‌, కంప్యూటర్‌ సైన్స్‌, మల్టీపర్పస్‌ హెల్త్‌ వర్కర్‌, మెడికల్‌ ల్యాబ్‌ టెక్నీషియన్‌, కన్స్ట్రక్షన్‌ ఇంజినీరింగ్‌ టెక్నాలజీ తదితర విభాగాల్లో ఖాళీలు ఉన్నాయి.
శ్రీహరికోట ఇస్రోలో ఉద్యోగాలకు ఆన్లైన్ దరఖాస్తు కోసం ఇక్కడ క్లిక్ చేయండి.
పోస్టుల వివరాలు
- ఇంజినీరింగ్‌ గ్రాడ్యుయేట్‌ అప్రెంటిస్‌ – 50 పోస్టులు
- నాన్‌ ఇంజినీరింగ్‌ గ్రాడ్యుయేట్‌ అప్రెంటిస్‌ – 60 పోస్టులు
- టెక్నీషియన్‌ అప్రెంటిస్‌ (డిప్లొమా) – 35 పోస్టులు
- డిప్లొమా (డీసీసీపీ) – 60 పోస్టులు
- ట్రేడ్‌ అప్రెంటిస్‌ – 180 పోస్టులు
- ఒకేషనల్‌ అప్రెంటిస్‌ – 15 పోస్టులు
సంబంధిత విభాగాల్లో గుర్తింపు పొందిన బోర్డు లేదా యూనివర్సిటీ నుంచి డిప్లొమా, బీఎస్సీ, బీకాం, బీఏ, బీఈ లేదా బీటెక్‌ ఉత్తీర్ణులై ఉండాలి. పోస్టును బట్టి విద్యార్హతలు మారుతాయి. కాబట్టి అభ్యర్థులు దరఖాస్తు చేసుకునే ముందు సంబంధిత పోస్టుకు నిర్దేశించిన అర్హతలను పరిశీలించాలి. శిక్షణ వ్యవధి 12 నెలలు. ఈ అర్హతలు కలిగిన వారు ఆన్లైన్ విధానంలో నవంబర్ 26, 2026వ తేదీ వరకు దరఖాస్తు చేసుకోవచ్చు. అభ్యర్థుల విద్యార్హతల్లో సాధించిన మార్కుల ఆధారంగా కేటగిరీల వారీగా మెరిట్‌ జాబితాను రూపొందిస్తారు. సంబంధిత విభాగం లేదా ట్రేడ్‌ ఆధారంగా అభ్యర్థులను షార్ట్‌లిస్ట్‌ చేసి డాక్యుమెంట్‌ వెరిఫికేషన్‌కు పిలుస్తారు. ధ్రువపత్రాల పరిశీలనలో అర్హత సాధించిన అభ్యర్థులను ఎంపిక చేస్తారు. ఎంపికైన అభ్యర్థులకు పోస్టుల కేటగిరీని బట్టి నెలవారీ స్టైపెండ్‌ చెల్లిస్తారు. గ్రాడ్యుయేట్‌ అప్రెంటిస్‌లకు నెలకు రూ.12,300, టెక్నీషియన్‌ అప్రెంటిస్‌లకు – రూ.10,900, ట్రేడ్‌, ఒకేషనల్‌ అప్రెంటిస్‌లకు – రూ.9,600 చొప్పున స్టైపెండ్‌ చెల్లిస్తారు.
ముఖ్యమైన తేదీలు
- ఆన్లైన్ దరఖాస్తుల ప్రారంభ తేదీ: నవంబర్ 6, 2026
- దరఖాస్తులకు చివరి తేదీ: నవంబర్ 26, 2026
- దరఖాస్తు విధానం: ఆన్లైన్
ఇస్రో వంటి ప్రతిష్ఠాత్మక అంతరిక్ష పరిశోధనా సంస్థలో అప్రెంటిస్‌ శిక్షణ పొందడం యువతకు మంచి అవకాశంగా చెప్పవచ్చు. సంబంధిత విద్యార్హతలు కలిగిన అభ్యర్థులు చివరి తేదీ వరకు వేచి ఉండకుండా ముందుగానే దరఖాస్తు చేసుకోవడం మంచిది. పూర్తి వివరాలు, పోస్టుల వారీగా అర్హతలు, దరఖాస్తు విధానం తెలుసుకోవడానికి అధికారిక నోటిఫికేషన్‌ను పరిశీలించాలి.
శ్రీహరికోట ఇస్రోలో ఉద్యోగాలకు ఆన్లైన్ దరఖాస్తు కోసం ఇక్కడ క్లిక్ చేయండి.