தீபாவளியை முன்னிட்டு நடிகர் சிம்பு நடிப்பில் உருவாகி வரும் அரசன் படத்தின் புதிய கிளிம்ப்ஸ் வீடியோ வெளியாகியுள்ளது. வெற்றிமாறன் இயக்கத்தில் உருவாகும் இப்படத்தின் மீதான எதிர்பார்ப்பு அதிகரித்து வரும் நிலையில், தற்போது வெளியாகியுள்ள ப்ரோமோ ரசிகர்களிடம் எதிர்பார்த்த வரவேற்பைப் பெறவில்லை.

அரசன் படத்தின் தீபாவளி அப்டேட்

இயக்குநர் வெற்றிமாறன் இயக்கத்தில் சிலம்பரசன் நடித்து வரும் திரைப்படம் அரசன். கலைப்புலி எஸ். தாணு தயாரிக்கும் இப்படத்திற்கு அனிருத் இசையமைக்கிறார். வடசென்னை படத்தின் உலகத்துடன் தொடர்புடைய கதைக்களத்தில் இப்படம் உருவாகி வருகிறது.

அரசன் படத்தின் அறிவிப்பு வெளியானது முதலே ரசிகர்கள் மத்தியில் பெரும் எதிர்பார்ப்பு நிலவி வருகிறது. குறிப்பாக, வெற்றிமாறன் - சிம்பு கூட்டணி என்பதால் இப்படத்தின் ஒவ்வொரு அப்டேட்டையும் ரசிகர்கள் ஆவலுடன் எதிர்பார்த்து வருகின்றனர்.

படத்தின் வெளியீடு தள்ளிப்போன நிலையில், ரசிகர்களுக்குத் தீபாவளி விருந்தாக ‘தி வேர்ல்டு ஆஃப் அரசன்’ என்ற சிறப்பு முன்னோட்டத்தை வெளியிடுவதாக சிம்பு ஏற்கெனவே அறிவித்திருந்தார்.

வெளியான ப்ரோமோ.. ஏமாற்றத்தில் ரசிகர்கள்!

அந்த வகையில், தீபாவளியை முன்னிட்டு அரசன் படத்தின் புதிய கிளிம்ப்ஸ் வீடியோ வெளியாகியுள்ளது. இதில் சிம்புவின் கதாபாத்திரத்தை அறிமுகப்படுத்தும் வகையில் ‘ஃபயரு.. ஃபயரு.. ஃபயரு.. தாஸ் அண்ணன் வந்தாலே ஃபயரு’ என்ற கானா பாடல் இடம்பெற்றுள்ளது.

சிம்புவின் மாஸ் தோற்றத்துடன் வெளியாகியுள்ள இந்த வீடியோவில், அவரை முன்னிலைப்படுத்தும் காட்சிகள் இடம்பெற்றுள்ளன. இருப்பினும், வெற்றிமாறனின் படைப்பில் சிம்பு நடிப்பதால் ரசிகர்கள் எதிர்பார்த்திருந்த விறுவிறுப்பான காட்சிகள் மற்றும் கதைக்களம் குறித்த அறிமுகம் இதில் இடம்பெறவில்லை என்ற விமர்சனங்கள் எழுந்துள்ளன.

ஏற்கெனவே படத்தின் வெளியீடு தள்ளிப்போனதால் ஏமாற்றத்தில் இருந்த ரசிகர்களுக்கு, தற்போது வெளியாகியுள்ள ப்ரோமோவும் எதிர்பார்த்த உற்சாகத்தைக் கொடுக்கவில்லை. இதனால் அரசன் படத்தின் அடுத்தடுத்த அப்டேட்கள் மற்றும் முழுமையான முன்னோட்டத்திற்காக ரசிகர்கள் காத்திருக்கின்றனர்.

They call the KING “DAAS”! 👑 📢Glimpse into ARASAN’s world soon! Happy Diwali! 🪔 Let the Fireu works continue💥 ▶️ https://t.co/gQZpwKSnhH #VetriMaaran @SilambarasanTR_ @VijaySethuOffl @anirudhofficial @priyankaamohan @GTelefilms @imManishShah #Yogalakshmi @iYogiBabu @VelrajR #Jacki @RIAZtheboss #fireufireufireu

— Kalaippuli S Thanu (@theVcreations) November 8, 2026