MDA baksa bakrimani bidingo party chanchitaigen
SHILLONG: United Democratic Party (UDP)-o donggipa gimik sak 12 MLA-rangoni sak 11 MLA-rang, party-ko wate katgrimani ja·man party-ni president aro saksakamkam MLA Metbah Lyngdoh, Sonibar salo, an·tangni Cabinet Minister ong·aniko wataha.
Lyngdoh-ni parakatani gitade, UDP-ni sak 11 MLA-rang wate katgrimani ja·man Assembly-o party-ni MLA ua saksasan dongaiahani gimin ua Cabinet Minister-ni kamko watna Sonibar salo, a·dokni Chief Minister Conrad K Sangma-na an·tangni kam watani chittiko on·angaha.
Iani bidingo kobor ra·timgipa manderang baksa agangrikengon, UDP-ni sak 11 MLA-rang, uko wate katgrimani ja·man party-o ua saksasan MLA dongaiahani gimin Cabinet Minister-ni kamko ua jako ra·e dongchana nangnikjaha aro iani bidingo ua name chanchichengani gimin ja·mansa Chief Minister-na an·tangni kam watani chittiko on·eaha ine Lyngdoh parakataha.
Mikkangchi uni party mai ja·kuko de·gen, iani giminde party-ni Central Executive Committee (CEC) aro committee-ni dilgiparangsa chanchigen ineba ua aganaha.
UDP president-ni parakatani gitade, UDP CEC-ni tom·aniko Mongolbar salo ong·atnaba gnang aro ia tom·anio CEC-ni member-rang chanchirimenba, National People’s Party (NPP)-chi dilenggipa Meghalaya Democratic Alliance (MDA) baksa bakrimangkugenma ma bakramjawaha uko tik ka·anggen.
Kam watchina draatako man·aha ine agananiko jegalatengon, ua maming saloba sakgipinrangni draanade kamtangko watjawa maina ian una dakgualani ong·gen ine Lyngdoh aganaha.
Adita salrangna skang, UDP-ni sakchet MLA-rang, party-oni ong·katgrime Bharatiya Janata Party (BJP)-o napangani ja·man, gipin sakgittam MLA-rangba NPP-o napangskaahachim.
Ia sak 11 MLA-rang, party-ko wate katahani gimin da·o Assembly-o UDP-ni MLA saksasan dongaiaha.
Re·anggipa 2025 bilsini September jao, MDA Cabinet-ko gital dake sualpiltaiaonin UDP-ni president Metbah Lyngdoh, Power, Water Resources, Taxation aro Textiles department-rangni Minister ong·e kamko ka·engachim ine nikna man·a.