SHILLONG: Sonibar salo, United Democratic Party (UDP)-ni president aro saksakamkam dongkuenggipa MLA Metbah Lyngdoh, Cabinet Minister-ni kamko watna chittiko seatahani gimin da·o Cabinet-o uni wate on·anggipa kamrangko National People’s Party (NPP)-o napgipa gital MLA-rangna on·skaani cholrang dongenga aro Cabinet-o gitcham minister Paul Lyngdoh-ko rimnapani cholrang dongbatenga.
Power, Water Resources, Taxation aro Textiles department-rangko jako ra·enggipa Metbah Lyngdoh, Cabinet-oni ong·katna Sonibar salo, a·dokni Chief Minister Conrad K Sangma-na kam watani chittiko on·atahani gimin da·o uni jako ra·gipa mingbri department-rangko sualpiltaiani cholrang donga.
Indake ong·genchimoba, ia mingbri portfolio-rangko maikai sualgen aro gital Cabinet-ko rikanio a·dokni Chief Minister, maikai ja·kuko de·gen, ian skanggipa aro mongsonggipa sing·anide ong·skaenga.
A·dokni gitcham Cabinet Minister Paul Lyngdoh, UDP-ni gipin sakgni MLA-rang, chong·motan Mawkyrwat MLA Renikton Lyngdoh Tongkhar aro Mowkaiaw MLA Nujorki Sungoh baksa NPP-o napangahani gimin da·o Paul Lyngdoh-nan Cabinet-o biapko man·ani cholrang nambatenga.
Indake ong·genchimoba, Paul Lyngdoh-ko Cabinet-o rimnapgenma ma Chief Minister-sa an·tangni ska gita gital Cabinet Minister-ko seokgenma da·o dipet name u·iatanirangko man·soa dongkuja.
UDP-ni gimik sak 12 MLA-rangoni sak 11 MLA-rangde da·o BJP aro NPP-o napangahani gimin Meghalaya Democratic Alliance (MDA)-o dingtanganikoba nikna man·aha maina UDP-ni sakchet MLA-rang napangani ja·man BJP-ba da·o Assembly-o sakgnioni sak 10 membor-rang gapaha aro UDP-ni sakgittam MLA-rang napangani ja·man NPP-ba Assembly-o sak 33-oni sak 36-ona tang·doangaha.
BJP-o sak 10 aro NPP-o sak 36 MLA-rang dongahani gimin ia party ge·gni nangrime sorkariko chalaigenchimoba sak 46 MLA-rang donge, maming neng·ani grian sorkariko chalaina man·aignokchim.
Indiba da·o dipet mongsonggipa sing·anide, Metbah Lyngdoh-ni watanggipa portfolio-rangko maikai Chief Minister Conrad K Sangma suale on·na miksongenga?
Ia kamrangko ua, a·dokni gitcham Minister aro UDP-ni gitcham MLA Paul Lyngdoh-na on·genma ma ia kamrangko dingtang dingtang member-rangna on·skagenma.