TURA: Meghalaya a·doko drugs ba pekatgipa samrangko badingani aro jakkalaniko champengna police, rakbee kamrangko ka·engon, Sonibar salo, Anti-Narcotic Task Force (ANTF)-ni official-rang, West Garo Hills police baksa nangrime, gram 112.52 ong·gipa heroin samrangko rim·na man·ani ja·man drugs badinggipa mande sakgniko, Assam Goalpara a·jaoniko rim·aha.
ANTF-ni Superintendent of Police (SP) Vikash Kumar-ni u·iatani gitade, koborrangko man·soani ja·man ANTF aro police official-rang, Tikrikilla-o am·sandianirangko dakenba, ia pekatgipa samrangko rim·na man·aha.
Ia heroin samrangko, sabon box ge 10-o chipe ra·baako rim·na man·aha aro ia samrangni damrangara, gong lak 60-mang ong·a ineba Kumar parakataha.
Ia samrang baksana gari bolgni aro mobile phone ge·gittamkoba rim·aha.
Rim·ako man·gipa mande sakgniara, Goalpara-oni bilsi 31 ong·gipa Shahadot Ali aro bilsi 31 ong·gipa Rejaul Islam ong·a.
Iani bidingo police, Tikrikilla Police Station-o NDPS Act-ni ning·o mokordomako ka·aha.
A·dokni dingtang dingtang biaprango, drugs badingenggipa manderangni gimin koborrangko man·genchimode ta·raken police-na u·iatchina gitaba ANTF-ni SP, manderangko didiataha aro iandakgipa manderangni bidingo u·iatgipa manderangna police, boksisrangko on·gen ine parakataha.