Union Home Minister-ko niatchina didia
SHILLONG: 2014 bilsio A·chik National Volunteers Council (ANVC) dolrang baksa songgigrikanio soi ka·grikaoni da·o bilsi 12 ong·pilahaoba, songgigrikanirangko chu·sokatchipkujaenga ine Bharatiya Janata Party (BJP)-ni state vice president aro Tura-ni MDC Bernard N Marak matnangatenba, iani bidingo kamrangko nirokatchina Union Home Minister Amit Shah-na sedoataha.
Iani bidingo, a·dokni Chief Secretary gita Union Home Minister-na sedoatengon, 2014 bilsini September 24 tariko ANVC dolrang baksa songgigrikaniko nipilna ta·raken Central aro State Level Monitoring Committee-ni tom·aniko ong·atchina Marak didiataha.
Marak-ni parakatani gitade. tom·tomaniko rakkina, namroro silroroaniko ta·rakbatatna aro Garo Hills-o Autonomous District Council-na bilrangko on·dapna gita 2014 bilsil India sorkari, Meghalaya sorkari aro ANVC dolrang, songgigrikanio soi ka·grikahachim.
Ia songgigrikanio ku·rachakgimin kamrangoni bang·batakon chu·sokatkujaengani gimin ian songgigrikanio soi ka·grikani miksonganikon pe·ani ong·enga ineba BJP-ni state vice president matnangataha.
Songgigrikani Paragraph 12.1-o janapgimin kattarangko gisik ra·atpilengon, Home Affairs Ministry-ni Joint Secretary (NE)-ni dilanichi, Central Monitoring Committee, jadokprakon ia songgigrikanirangko ja·rikama ja·rikjaenga, uko nipilani ong·achim aro ia committee-o Meghalaya sorkari, Council aro ANVC-ni member-ba bak ong·pana nangachim ine Marak parakataha.
Ia committee, batanggimin bilsidokni gisepo changsaba tom·aniko ong·ata dongkuja ine janapatengon, ia committee-ni tom·aniko ta·raken Tura-o ong·atchina aro dongimin niamrangko nirokchina Tura MDC didiataha.
Marak-ni parakatani gitade, state level-o Meghalaya sorkari, re·anggipa 2025 bilsini September 26 tariko, Shillong-o tom·aniko ong·atangenba, ANVC dolrang baksa songgigrikaniko ta·rake chu·sokatna jagniprakon tolm·aniko ong·atgen ine ku·rachakaniko on·angahachim indiba ia tom·aniko ong·ataoni da·o bilsisa batpilengahaoba aro changni chang gisik ra·atpilaniko on·ahaoba tom·anirangko ong·attaia dongkujaenga.
COVID-19 sajinmana skang, tom·aniko ong·atanio uko State Level Review Committee-o saksa member dake ra·na ku·rachakaniko on·ahachim indiba da·alonan a·dok sorkari, ia ku·rachakaniko chu·sokatkujaenga ineba Marak matnangataha.
Ia songgigrikani Para 12.2-ni ning·o ia committee-ko songpiltaichina aro ku·rachakanirangko chu·gimik chu·sokatkujaskal jagniprakon Tura-o tom·aniko ong·atchinaba BJP-ni state vice president didiataha.
Garo Hills Autonomous District Council (GHADC)-ko mangrakbatatna gita dingtang dingtang department-rang jekai, Public Works Department, Public Health Engineering Department, Agriculture, Irrigation, Fisheries, Tourism, Arts & Culture, registration of births and deaths, aro Rural & Urban Affairs-ko pakwatna songgigrikani giminba Marak gisik ra·atpilaniko on·angaha.
Una agreba, Garo Hills-o Medical College-cum-Hospital, Nursing School, Paramedical Institute, Women & Children Hospital-ko kulina songgigrikani gimina Tura MDC, gisik ra·atpilaniko on·angaha.