സോണിയ ഗാന്ധിക്കെതിരെയുള്ള സൈബർ ആക്രമണത്തിൽ പ്രതികരിച്ച നടി പാർവതി തിരുവോത്തിനെതിരെ രൂക്ഷ വിമർശനവുമായി നടി മായ മേനോൻ രംഗത്തെത്തിയിരിക്കുന്നു. സിനിമകളുടെ പ്രമോഷൻ വേളകളിൽ മാത്രം പ്രത്യക്ഷപ്പെട്ട് ഹിന്ദു വിരോധം തുപ്പുന്ന ആളാണ് പാർവതിയെന്നും അവരുടെ പ്രസ്താവനയ്ക്ക് പുല്ലുവില പോലും നൽകുന്നില്ലെന്നും മായ മേനോൻ സമൂഹ മാധ്യമങ്ങളിലൂടെ വ്യക്തമാക്കി. രാഹുൽ ഗാന്ധിയുടെ പരാമർശത്തെ തുടർന്ന് സോണിയ ഗാന്ധി നേരിടുന്ന സൈബർ ആക്രമണങ്ങളെ എതിർത്തുകൊണ്ട് പാർവതി തിരുവോത്ത് രംഗത്തു വന്നിരുന്നു. സോണിയ ഗാന്ധിയുടെ ചിത്രങ്ങളെ വിമർശിക്കുന്നവർ ഗുജറാത്ത് കലാപത്തിലെ ബിൽക്കിസ് ബാനോയുടെ കാര്യത്തിൽ പുലർത്തുന്ന മൗനത്തെയും ഇരട്ടത്താപ്പിനെയും പാർവതി ശക്തമായ ഭാഷയിൽ ചോദ്യം ചെയ്തിരുന്നു. ബിൽക്കിസ് ബാനോ കേസ് പ്രതികളുടെ ശിക്ഷാ ഇളവ് ചൂണ്ടിക്കാണിച്ചുകൊണ്ട്, സാംസ്കാരിക പാരമ്പര്യം പറയുന്നവർ ഇത്തരം വിഷയങ്ങളിൽ മൗനം പാലിക്കുന്നത് എങ്ങനെയെന്ന് പാർവതി ചോദിച്ചതാണ് ഈ വിവാദങ്ങൾക്ക് ആധാരം.