Former IPS Officer AB Venkateswara Rao Political Failure: విజయవాడ నగరపాలక సంస్థ మేయర్ పీఠంపై కన్నేసి, ప్రత్యక్ష రాజకీయ అరంగేట్రం చేసిన మాజీ ఐపీఎస్ అధికారి ఏబీ వెంకటేశ్వరరావుకు బెజవాడ ఓటర్లు ఊహించని రీతిలో షాక్ ఇచ్చారు. సుదీర్ఘకాలం ఉన్నత సివిల్ సర్వెంట్‌గా పనిచేసిన అనుభవం, సమాజంలో తనకు ఉందనుకున్న ఇమేజ్, ఐఏఎస్-ఐపీఎస్ వర్గాల్లో ఉన్న గుర్తింపు తన్ను గెలిపిస్తాయని లేదా కనీసం ఓట్ల సునామీ సృష్టిస్తాయని ఆశించిన ఏబీవీకి ఓట్ల లెక్కింపు తీవ్ర నైరాశ్యాన్నే మిగిల్చింది. ఓట్ల లెక్కింపు ముగిసేసరికి ఆయన సాధించిన ఓట్లు కేవలం 12,642 ఓట్లు వద్దే నిలిచిపోవడంతో డిపాజిట్‌ను కూడా దక్కించుకోలేక ఘోర పరాభవాన్ని మూటగట్టుకున్నారు.
కూటమి అభ్యర్థి ఘన విజయం
విజయవాడ మేయర్ బరిలో కూటమి తరపున జనసేన అభ్యర్థి వంగవీటి రాధాకృష్ణ ఏకంగా 2.65 లక్షలకు పైగా ఓట్లతో భారీ మెజార్టీ సాధించి విజయం సాధించగా, వైఎస్సార్‌సీపీ అభ్యర్థి రాయన భాగ్యలక్ష్మి 1.35 లక్షల ఓట్లతో రెండవ స్థానంలో నిలిచారు. అయితే, కాంగ్రెస్, సీపీఐ, సీపీఎంల ఉమ్మడి పొత్తు మద్దతుతో బరిలోకి దిగిన ఏబీ వెంకటేశ్వరరావు కనీసం ముక్కోణపు పోటీ ఇవ్వడంలోనూ దారుణంగా విఫలమయ్యారు. గతంలో సీపీఎం లేదా కాంగ్రెస్ అభ్యర్థులు విజయవాడ కార్పొరేషన్ పరిధిలో సాధించే సంప్రదాయ ఓటు బ్యాంక్ కూడా ఏబీవీకి బదిలీ కాలేదని ఎన్నికల గణాంకాలు స్పష్టం చేస్తున్నాయి.ఈ ఘోర పరాజయం వెనుక ఉన్న ప్రధాన కారణాలను విశ్లేషిస్తే— బ్యూరోక్రాటిక్ ఇమేజ్ వేరు, పొలిటికల్ అక్సెప్టెన్స్ వేరనే చేదు నిజాన్ని ఏబీవీ గ్రహించలేకపోవడమే. సర్వీసులో ఉన్నప్పుడు ఉన్నతాధికారిగా పేరు ప్రఖ్యాతులు సంపాదించినంత మాత్రాన ప్రజలు ఓట్లు వేసేస్తారనుకోవడం రాజకీయాల్లో అతిపెద్ద పొరపాటు. స్థానిక ప్రజా సమస్యలపై సుదీర్ఘంగా క్షేత్రస్థాయి పోరాటాలు చేయకుండా, కేవలం మీడియా డిబేట్లు, లీగల్ పోరాటాల ఆధారంగా పొలిటికల్ మైలేజ్ పొందాలనుకోవడం వికటించింది. స్థానిక ఓటరుకు నిత్యం అందుబాటులో ఉండే ప్రజా నాయకుడు కావాలే తప్ప, కేవలం టీవీల్లో నీతులు చెప్పే రిటైర్డ్ అధికారి కాదనే సందేశాన్ని బెజవాడ ప్రజలు స్పష్టంగా ఇచ్చారు.
సొంత పార్టీ పెడతానని హడావుడి
అంతేకాకుండా, సొంతంగా రాజకీయ పార్టీ పెడతానని గతంలో హడావుడి ప్రకటనలు చేసిన ఏబీ వెంకటేశ్వరరావు, తీరా ఎన్నికలు వచ్చేసరికి సొంత వేదికను ఏర్పాటు చేసుకోలేకపోయారు. చివరికి సిద్ధాంతాలు, వైఖరులతో సంబంధం లేని కాంగ్రెస్, కమ్యూనిస్టుల మద్దతుతో స్వతంత్ర అభ్యర్థిగా బరిలోకి దిగడం ఆయన రాజకీయ పరిణతి రాహిత్యాన్ని ఎత్తిచూపింది. సొంత క్యాడర్, పునాది లేని చోట కేవలం ఇతర పార్టీల కండువాల సపోర్ట్‌తో గెలవవచ్చనే ఆయన అంచనా తలకిందులైంది. ఈ ఎన్నికల తీర్పు ఏబీ వెంకటేశ్వరరావు భవిష్యత్ రాజకీయ ప్రయాణానికి విరామం పలికినట్లే అని విశ్లేషకులు భావిస్తున్నారు. డిపాజిట్ కూడా కాపాడుకోలేని స్థాయిలో 13 వేల లోపు ఓట్లకు పరిమితమైన ఒక నేత, రేపు సొంత రాజకీయ పార్టీని ప్రకటించినా లేదా ఏదైనా పార్టీలో చేరాలనుకున్నా ఆయనను సీరియస్‌గా తీసుకునే నాథుడే ఉండడు. ఆయన పెట్టబోయే పార్టీకి ఆర్థిక, మానవ వనరులు సిద్ధం కావడం అటుంచి, కనీసం ద్వితీయ శ్రేణి నేతలు కూడా ఆయన వెంట నడిచేందుకు సాహసించని పరిస్థితి నెలకొంది.
విజయవాడ మేయర్ ఎన్నికల తీర్పు సివిల్ సర్వెంట్లకు ఒక స్పష్టమైన హెచ్చరిక లాంటిది. సుదీర్ఘకాలం అధికార హోదాలో ఉండి, పదవీ విరమణ అనంతరం ఉన్నపళంగా రాజకీయాల్లోకి వచ్చి రాత్రికి రాత్రే నాయకులు అయిపోవచ్చనే భ్రమలను బెజవాడ ఓటర్లు చెరిపివేశారు. ఏబీ వెంకటేశ్వరరావు చేసిన ఈ పొలిటికల్ ప్రయోగం ఆయన ఐపీఎస్ ఇమేజ్‌ను దెబ్బతీయడమే కాకుండా, రాజకీయ భవిష్యత్తును ప్రారంభంలోనే మూసేసిందన్న అభిప్రాయం బలంగా వినిపిస్తోంది.