சென்னை: “நீதித்துறையின் அன்றாட நடவடிக்கைகள் மற்றும் நீதிபதிகளைத் தனிப்பட்ட முறையில் தாக்கி, அவதூறு ஏற்படுத்தும் விதமாக போராட யாருக்கும் அனுமதி வழங்கக் கூடாது” என்று தமிழக அரசுக்கு உயர் நீதிமன்றம் உத்தரவிட்டுள்ளது.
இஸ்லாம் மதத்துக்கு மாறிய ஒருவர், பிற்படுத்தப்பட்ட வகுப்பைச் சேர்ந்த முஸ்லிம் என சாதி சான்று கோர முடியாது என்று உயர் நீதிமன்ற மதுரை கிளை கடந்த ஜூன் 25-ம் தேதி உத்தரவிட்டிருந்தது.
இந்த உத்தரவைக் கண்டித்து தமிழகம் முழுவதும் தமிழ்நாடு தவ்ஹீத் ஜமாத், தமிழ்நாடு முஸ்லிம் முன்னேற்றக் கழகம் உள்ளிட்ட அமைப்புகள் போராட்டங்களை நடத்தின. அப்போது தீர்ப்பு வழங்கிய நீதிபதிக்கு எதிராக அவதூறு ஏற்படுத்தும் வகையில் பிரச்சாரம் செய்ததாகக் குற்றம் சாட்டி சென்னையைச் சேர்ந்த ஆர்.கார்த்திகேயன் என்பவர் சென்னை உயர் நீதிமன்றத்தில் பொதுநல வழக்கு தொடர்ந்தார்.
அவரது மனுவில், “தீர்ப்பு வழங்கும் நீதிபதிகளைத் தனிப்பட்ட முறையில் தாக்கி பிரச்சாரத்தில் ஈடுபட்ட இஸ்லாமிய அமைப்புகள் மீது நடவடிக்கை எடுக்க உத்தரவிட வேண்டும்.
எதிர்காலத்தில் நீதிபதிகளைத் தனிப்பட்ட முறையில் அவமதித்து பிரச்சார பொதுக்கூட்டங்கள், போராட்டங்கள் நடத்தவோ, சமூக வலைதளங்களில் பதிவிடவோ அனுதிக்கக் கூடாது” என்று கோரியிருந்தார்.
இந்த வழக்கு தலைமை நீதிபதி எஸ்.ஏ.தர்மாதிகாரி மற்றும் நீதிபதி ஜி.அருள்முருகன் ஆகியோர் அடங்கிய அமர்வில் விசாரணைக்கு வந்தது.
அப்போது காவல்துறை தரப்பில், உயர் நீதிமன்ற நீதிபதியை அவமதிக்கும் வகையில் அனுமதியின்றி போராட்டத்தில் ஈடுபட்டவர்கள் மீது வழக்குப் பதிவு செய்து நடவடிக்கை எடுக்கப்பட்டுள்ளதாகத் தெரிவிக்கப்பட்டது.
அதன்பின் நீதிபதிகள் பிறப்பித்த உத்தரவில் கூறியிருப்பதாவது: நீதித்துறை சுதந்திரம் அரசியல் சட்டத்தின் அடிப்படை கட்டமைப்பு என உச்ச நீதிமன்றம் ஏற்கெனவே தெளிவுபடுத்தியுள்ளது. அதில் யாரும் தலையீடு செய்ய முடியாது.
நீதித்துறை எடுக்கும் முடிவுகளுக்காகத் தனிப்பட்ட முறையில் நீதிபதிகளைப் பொது வெளியில் விமர்சிப்பது, அவர்களைத் தாக்கி பிரச்சாரத்தில் ஈடுபடுவது, போராட்டம் நடத்துவது என்பது அரசியலமைப்பு சட்ட நடைமுறையின் வேரையே பாதிக்கச் செய்துவிடும்.
நீதிமன்ற தீர்ப்புகளுக்கு தனிப்பட்ட முறையில் சம்பந்தப்பட்ட நீதிபதிகளைக் குறிவைத்து தாக்கிப் பேச முடியாது. அது கருத்து மற்றும் பேச்சு சுதந்திர வரையறைக்குள்
வராது. அதேநேரம் அனைத்து பொது விவாதங்களுக்கும், அமைதியாகக் கூடி போராட்டத்தில் ஈடுபடுவதற்கும் பொத்தாம் பொதுவாகத் தடை விதித்துவிட முடியாது.
நீதித்துறையின் நேர்மை, பாதுகாப்புக்கு அச்சுறுத்தல் ஏற்படுத்தும் வகையில் எந்த நிகழ்வும் நடைபெறவில்லை என்பதை அரசு இயந்திரம் உறுதி செய்ய வேண்டும்.
குறிப்பாக நீதித்துறையின் அன்றாட நடவடிக்கைகள் மற்றும் நீதிபதிகளைத் தனிப்பட்ட முறையில் தாக்கி, அவதூறு ஏற்படுத்தும் விதமாகப் போராட யாருக்கும் அனுமதி வழங்கக் கூடாது. நீதிபதிகளுக்கு அச்சுறுத்தல் விடுக்கும் நபர்கள் மீது போலீஸார் சட்ட ரீதியாக உரிய நடவடிக்கை எடுக்க வேண்டும்.
சிஜேபி நிர்வாகி சவுரவ் தாஸ் பூர்வீகம் குறித்து விசாரணை நடத்த கோரி வழக்கு: மத்திய அரசு பதிலளிக்க உத்தரவு