TURA: Garo Hills Autonomous District Council (GHADC)-ni adita constituency-rangko gital dake sima salpiltaina ja·ku de·anio, gitcham Shyamnagar GDC Constituency-ko ra·galna miksonganirang donga ine koborko man·soani ja·man Phulbari jolo donggipa dolsku NGO-rang jegalatenba, ia Shyamnagar constituency-ko ra·galgenchimode Phulbari Legislative Assembly Constituency gimikoni darangba Council-o membor ong·pana man·jawaha ine jajrengchakaniko parakataha.
GHADC-o Shyamnagar Constituency-ko ra·galna miksongenganiko Garo Students’ Union (GSU), FKJGP, AHAM, ASPF, AYWO, ADE, ADIL, CEPARD aro ACHIK dolrang jegalatengon, da·o dipet iani bidingo official-ni gita maming u·iatanirangko man·soa dongkujagenchimoba, ian Phulbari jolrango songdongenggipa manderangna jajrengna nanganiko ra·baaha ine parakataha.
Shyamnagar GHADC Constituency-ko ra·galaha ong·ode, Phulbari jolrango GHADC-ni seat damsaba dongjawaha aro Rajabala LAC-osa seat damgni dongskagnok ine janapatengon, ian Phulbari LAC-ni ning·o donggipa manderangnade kragijani ong·enga ine dolsku NGO-rang parakataha.
Shyamnagar constituency-ara GHADC-o gitchambatsranggipa constituency-rangoni damsa ong·a ine janapatskaengon, ian Phulbari LAC-ni ning·o donggipa manderangna, joltangni MDC-ko seoke watatna aro jolo namroro silroroaniko ra·bana chol ong·paachim ine NGO-rang parakataha.
Ia constituency-ba, GHADC-na dingtang electoral roll-ko aro GHADC election-o susagipa candidate-rangna Scheduled Tribe (ST) certificate-ko dabie chu·sokatanio bak ong·pagipa ong·a ineba Phulbari-ni NGO-rang parakataha.
GHADC-ni constituency-rangko gital dake sualanio, darangnaba nangchakeani dongjana gita jinmana parak ong·ani dongna nanga ineba NGO-rang parakataha.
Shyamnagar constituency-ko ra·galna miksonganirang dongbebeama dongja, iani bidingo ta·raken talataniko on·china aro ia constituency-ko ra·galjachina gitaba NGO-rang, GHADC aro a·dok sorkario dabiangaha.
Delimitation Committee-ni report-ko bon·kame tik ka·na skang, dingtang dingtang songni Nokmarang, Gaonburarang, songni dilgiparang aro dingtang dingtang dolrang baksa tom·e chanchirimaniko ong·atchinaba Phulbari NGO-rang dabiangaha.