Man·gnitangna dabie jingjengataniara democratic right-sa ong·a
TURA: All Garo Hills Primary School Teachers’ Association (AGHPSTA), Deputy Chief Minister Prestone Tynsong-ni jingjengatenggipa skigiparangko ‘a·kin’ aro ‘sogimin biterang’ ine chonikanina raken jegale kema bi·china dabiaha.Batanggimin October jani 12 tariko Tynsong-ni agangipa kattarangko Butbar salo association, raken jegalaha. Ian skigiparangko chonika ong·a, iako ra·chakna man·teljawa ine aganaha.
Skigiparang, uamangni man·a nanggnirangko man·asa ku·rang on·enga, ian uamangni democractic right ba bil ong·a, uamang MLA-ni scheme-ko dabia ong·ja ba an·tangtangni namgnirangna dabie jingjengatenga ine ong·ja ine association, jingjengatgipa skigiparangna chakpaaha.
Bi·sarangna nama skianiko on·enggipa skigiparangara iandakgipa chonike roaniko man·a kraja, uamang mande ra·anikosa man·a krachongmota ine AGHPSTA agankuaha.
Uandake Chief Justice of India-ni a·songoni kamgri ong·e dongenggipa chadamberangko chonikachi ‘Cockroach Janata Party’ ong·katbaaha ine janape association, iandakgipa kragija ba ong·gija kattarangko aganjachina mikrakataha. Iandakgipa kattarang maidakgipa sal somoirangko ra·bana man·gen darangba u·isona man·ja.
Indake association Deputy Chief Minister-ko skigiparango kema bi·china dabiaha.
“Skigiparangara a·kin ong·ja, sogimin bolam biterang ong·ja. Uamang songsalko rikanio pangchakaniko on·giparangsa ong·a ine association aganaha.
