BAGHMARA: South Garo Hills a·jani Emangre songo donggipa Rongdik chibimaoniko niam gri an·cheng aro ro·ong bikotenga ine Garo Students Union (GSU) Karukol regional unit parakatenba, ia chibimaoniko niam gri an·cheng aro ro·ong bikotaniko ta·raken champengatchina sorkariko didiataha.
GSU Karukol unit-ni parakatani gitade, ia Rongdik chibimaoniko re·anggipa November 6 tarik dipet, niam gri an·cheng aro ro·ong bikotna a·bachengpiltaiaha.
Iana skangba ia chibimaoniko niam gri an·cheng aro ro·ong bikotengani gimin 2025 bilsini December 3 tarikon GSU, songbadrango seate, ia biapo niam gri an·cheng aro ro·ong bikotaniko champengchina sorkariko didiatahachim indiba da·o gital dake ia chibimaoniko an·cheng aro ro·ong bikotna a·bachengpiltaianiara, sorkarini kamko sing·dona nanganiko ong·katataha ine GSU Karukol unit parakataha.
Ia chibimaoniko an·cheng aro ro·ong bikotenggipa manderang, mining permission aro environmental clearance-rang dongama dongja, iani bidingo talataniko on·chinaba GSU, District Administration, Meghalaya State Pollution Control Board, Mining & Geology Department aro gipin nangchakegipa department-rangko didiataha.
Chibimarangoniko niam gri an·cheng aro ro·ong bikotanichi, samtangtango ong·telaigiparangna nangchakeaniko ra·baani gimin janapatengon, niam gri a·ningni bosturangko bikotanichi chisamrango a·a ruronganiko, chio donggipa jonturangna nangchakeaniko, chini ramako dingtangatna aro chibimao pangchake janggi tangenggipa manderangna kenchakna nanganiko ong·ata ine GSU Karukol unit parakataha.
Rongdik chibimao an·cheng aro ro·ong bikotaniko champengna maming ja·kurangko de·ja ong·ode ainni gita ja·kurangko de·na draatako man·gen ineba GSU Karukol regional unit, mikrakataniko on·angaha.