SHILLONG: Cabinet-ko jujaatanio bilo donggipa bakrimgipa dolrangni gisepo meligrikjaengani bidingo parakengon National People’s Party (NPP), ‘BJP ba gipin bakrimgipa dolrang baksa BJP-ni legislator-rangko Cabinet-ko rimnapani gimin mamingkon chanchisoa ba tik ka·soa dongja’ ine agantalataha.
NPP-ni state president aro Cabinet Minister Prestone Tynsong, koborna u·iatengon indine aganaha, “UDP-ni gitcham sak 11 legislator BJP aro NPP-o bakrimna skang cabinet-ni gimin mamingkon tik ka·soa dongja.”
Uandake BJP-na cabinet-ko on·dapnaba gnang ine BJP-ni ka·dongani gimin sing·anirangna aganchakengon, Tynsong, indine agankuaha, “party-na uandakgipa ka·donganiko on·soa dongja.”
Cabinet-ko jujaatanio aro portfolio-rangko sualani bidingo BJP-ni suk ong·jani gimin Tynsong, iandakgipa talatanirangko on·aha. Cabinet Minister aro BJP-ni dilgipa Sanbor Shullai, party-na ministerial berth ba biapko on·dapjani gimin suk ong·gijaniko parakaha.
SAk 60 memborrangni Assembly-o BJP-ni sak 10 MLA-rang donge Meghalaya Democratic Alliance (MDA)-o gnigipa dal·batgipa party ong·ani gimin BJP-na cabinet-o biapko on·dapna nangao ga·akachim. Beben NPP-ni legislator-rangko cabinet-ko rimnapani gimin maming neng·nikade dongja indiba cabinet-ko jujatanio aro portfolio -ko sualna skang BJP baksa agangrikchengna nangachim ine Shullai aganaha.
Portfolio sualaniko niatgenchimode NPP-ni minister Paul Lyngdoh-na Tourism, Social Welfare, aro Arts and Culture-ko on·aha, party-ni a·gipi dilgipa Timothy D. Shira-na Agriculture and Farmers’ Welfare, Power and Water Resources-ko tikataha.
Shullai-na Animal Husbandry and Veterinary, Fisheries, Taxation, Legal Metrology, aro Printing and Stationery-ko on·aha indiba uoniko Arts and Culture portfolio-ko ra·pilskaha. Metbah-ni jako ra·gipa Power and Water Resources department-ko Shira-na on·aha. Indake da·ode cabinet-o NPP-ni saksku minister-rang donga aro BJP-ni sakgni, HSPDP-ni saksa minister donga.