SHILLONG: Cabinet-ko jujaatanio suk ong·gijaniko Meghalaya BJP, party-ni central leadership ba ma·mong dilgiparangona sokataha. Minister Sanbor Shullai-ko maming u·iatsoa gri Arts and Culture portfolio-ko ra·pilani gimin BJP, suk ong·giijako parakaha.
BJP-ni state spokesperson M Kharkrang, kobor ra·timgiparang baksa agangrikmitingo  cabinet-ko jujaatani gimin aganengon, ‘Meghalaya Democratic Alliance (MDA) sorkarini cabinet-ko jujaatanio BJP, baksa mamingkon ku·monga dongjani gimin suk ong·jaha.’ ine aganaha.
Assembly-o BJP-ni legislator-rang sakgnioni sak 10-ona baridapahani gimin cabinet-o biapko man·dapna kraachim indiba uni palo Shullai-oniko Arts and Culture portfolio-ko ra·pilaha, iako party, namnikjaha.
Cabinet-ko jujaatna skang BJP-ni sak 10 MLA-rang baksa ku·mongna nangachim ine Kharkrang aganaha.
Indiba a·dokni BJP dilgiparang iani bidingo tom·e chanchirimenba New Delhi-ona re·ange BJP central leadership baksa agangrikena tik ka·aha.
Minggipin BJP, MDA sorkarina chakpaaniko ra·galna miksongenga ine kobor jangako kakket ong·ja ine Kharkrang talataha.