TURA: Garo Hills-ni Meghalaya Energy Corporation Limited (MeECL)-o bangbang ong·e dongenggipa kamrangko gapatna gita ta·raken kamo ra·aniko a·bachengatchina aro Junior Engineer-rangna promotional examination-ko ong·atchina Tura-ni social activist Flaming B Marak, MeECL-ni official-rangko didiataha.
Iani bidingo MeECL-na sedoatengon, BE/BTech degree donggipa Junior Engineer-rangko porikka seachi Assistant Engineer-ni kamona ra·doatna gita 2019 bilsini May 24 tarikon Shillong-ni Corporate Affairs Director, office memorandum-ko on·aha ine Marak parakataha.
Ia office memorandum-ko on·ani ja·man, 2019 bilsini June 15 tariko, MeECL-ni selection committee, written examination ba porikkako ong·ataha aro ia porikkao sak 13 junior engineer-rang chu·sokgipa ong·e, assistant engineer-ona ra·doatako man·aha ineba Marak parakataha.
Iandakgipa promotional examination-ko ong·atna bilsigittamprakon changprak ong·atna memorandum-o janapa dongachim ine janapatengon, 2019 bilsio ong·atgipa porikkaonin da·o baditaba bilsirang re·angaha indiba promotional exam-rangko ong·attaia dongkuja aro Garo Hills-ni pilak biaprangon assistant engineer-ni kamrang bang·en bangbang ong·e dongna nangenga ine Marak parakataha.
Iani bidingo ta·raken selection committee baksa agangrikchina aro junior engineer-rangko ia assistant engineer-rangni kamo gapatna gita ta·raken porikkako ong·atchinaba Marak, MeECL-ko didiataha.
Garo Hills-ni dingtang dingtang biaprango donggipa MeECL office-rango MLA, regular meter reader, regular lineman aro bill clerk-rang bangbang ong·e dongenga ine janapatskaengon, ia kamrangko ta·raken gapatchina gitaba Marak, MeECL-ni official-rangko didiataha.